Kjo njësi ka një ekip të specializuar që vazhdimisht mbledh të dhëna mbi sektorin e bujqësisë nga burime të ndryshme publike dhe private, verifikon dhe kontrollon saktësinë e të dhënave si dhe bënë sistemimin e tyre në një bazë unike të informatave mbi zhvillimet në këtë sektor. Njësia ofron burim të besueshëm dhe të pavarur të të dhënave mbi tregun përfshi informatat jo-publike mbi sektorin e bujqësisë, të cilat i shërbejnë ndërmarrjeve ekzistuese dhe të reja në Kosovë, qeverisë, hartuesve të politikave dhe investitorëve potencial vendor dhe ndërkombëtar. Njësia për Analizimin e të Dhënave publikon raporte dhe përmbledhje të studimeve në baza të rregullta si dhe ofron mundësinë për analiza më te thelluara, hulumtime dhe studime tjera afariste me porosi për klientë të interesuar, duke u ofruar atyre njohuri të detajuara mbi zhvillimet, mundësitë dhe kërcënimet për sektorin dhe nën-sektorët përkatës. Analizimi i të dhënave bëhet për gjithë zinxhirin e vlerës, duke pasqyruar tërësisht çdo segment të tregut. Shërbimet e ofruara përfshijnë hulumtime në nivelin makro ekonomik, raportim analitik sektorial dhe nën-sektorial, raporte të specializuara për produktet dhe analiza të tregut dhe studime mbi konkurrencën dhe akterët e tregut.

Nëpërmjet njësisë për Shërbime Gjithëpërfshirëse Këshilluese për Agrobiznese, Agro Qendra Recura ofron shërbime qe përfshijnë studime të fizibilitetit për investime të planifikuara, plane të biznesit dhe të rrjedhës së parasë, plane për Investimet Kapitale dhe Shpenzime Operative, analiza të sensitivitetit dhe strategji për kufizimin rrezikut afarist. Shërbimet gjithashtu përfshijnë informata mbi trendët ekonomike dhe potencialet e tregut, partneritetet strategjike, ekspertizë nga fusha e agronomisë, teknologjisë ushqimore dhe shërbimeve në fushën e sigurisë dhe standardeve ushqimore.

Qendra ofron një cikël të plotë të shërbimeve këshilluese për investime dhe “bashkim-blerje” (përfshirë mbështetjen financiare, teknike dhe ligjore) për transaksione specifike investive në fushën e agrobiznesit. Përveç investimeve, Qendra gjithashtu posedon dhe mirëmban një bazë të dhënash të të gjitha programeve dhe projekteve të cilat ofrojnë mbështetje financiare nëpërmjet granteve.

Qendra ndihmon në ndërmjetësimin e ofertës dhe kërkesës përmes mirëmbajtjes dhe përditësimit të një baze të dhënash të prodhuesve, e cila përfshirë produktet, sasinë, cilësinë dhe çmimet, dhe i i ndërlidh këto me informatat e blerësve mbi sasitë, sezonalitetin dhe çmimet e blerjes, proces ky që ka për qëllim rritjen e efikasitetit të tregut. Shërbimet e ndërlidhjes në mes të palëve furnizuese dhe blerëse do mbështeten po ashtu me shërbime ligjore në krijimin e marrëdhënieve kontraktuale të cilat përfshijnë mekanizma për zgjidhje të shpejta në raste të mosmarrëveshjes. Shërbimet aktualisht janë të përqendruara në popullimin e të dhënave në bazën e të dhënave dhe krijimin e ndërlidhjeve në mes të palëve në tregun e brendshëm. Qendra do të fillojë të zgjerojë tregjet e shërbyera duke filluar me vendet e rajonit, dhe më vonë në ofrimin e shërbimeve të ndërmjetësimit tregtar për tregjet ndërkombëtare.

Rritja e sigurisë dhe cilësisë ushqimore është një parakusht për rritjen e konkurueshmërisë në treg, gjë që kontribuon në rritjen e kërkesës për produktet vendore nga pjesëmarrësit në zinxhirin e vlerës si në tregun vendor ashtu edhe në tregjet ndërkombëtare. Në shumë raste, standardet specifike të cilësisë dhe sigurisë ushqimore janë një parakusht për të hyrë në tregjet ndërkombëtare, por po ashtu gjithnjë e më shumë në tregun vendor. Në kuadër të njësisë së shërbimeve të këshillimit mbi standardet e cilësisë dhe të sigurisë në ushqim, Agro Qendra ofron trajnime dhe auditime në lëmin e standardeve të cilësisë të cilat ndihmojnë ndërmarrjet në përmbushjen e kërkesave të cilësisë dhe sigurisë ushqimore për tregjet e synuara. Si partner i fushës në Kosovë i Korporatës Financiare Ndërkombëtare (IFC, pjesë e Grupit të Bankës Botërore), RECURA është duke punuar së bashku me IFC për të promovuar praktikat më të mira në sigurinë e ushqimit dhe standardet e cilësisë.

Agro Qendra gjithashtu shërben si një njësi për hartimin e politikave zhvillimore, duke i shërbyer këtë mënyre si interesit publik përmes studimeve të ndryshme, ashtu edhe politikbërësve, shoqatave dhe odave të specializuara për të promovuar nismat dhe ndryshimet në politika dhe legjislacion me qëllim t rritjes së konkurueshmërisë dhe përmirësimit të performancës së nën-sektorëve specifik.

Agro Qendra do të shërbejë gjithashtu si një adresë e trajnimeve dhe burimeve njerëzore, ku do të organizohet një numër trajnimesh të përgjithshme gjatë gjithë vitit, me mundësinë e kryerjes së trajnimeve të specializuara për klientët e biznesit